Chhei raw le, inbe fo si e ti lo chuan ka lehkhathawn i dawng nawlh mai. Amak pawh i ti maithei, ti mahla a âwm lo hran chuang lo ve, tunlaia mite tih ngai loh kha a ni tawh miau a. “A hmasain kut suih loh chibai le” ti a han tan mawi ve awm pawh a ni a, mahse chutianga han tan khawmawi pawh chu ka tum chuang lem hlei lova.
Sawi tur ka hre em em pawh a ni law, sawi loh tur pawh ka hre chuang lem lo va. Tunlai chu khawharna leh lunglenna ten inkawm turin min rawn sawm deuh chhen a, hman lo inti viau thin mah ila ka tang zo lo leh thin. Enga pawh chu nise, dam leh hriselna nen kan inkawmngeih rih a, a lawmawm viau zel e. Inkawmngeih sawi takah chuan, thian inkawmngeih tak tak hi an lo tam khawp mai ti raw, chung zingah chuan keini pawh hi inchhiar tel ve hmiah mai ang, mi pawi kan sawi em lo ang chu maw. Tunlaia an uar em em sms te pawh hi, inkawmngeihna hmanrua atan pawh a lo tangkai theih ve viau hi tih velte ka ngaihtuah mai mai thin a. Sms sawi takah chuan, a hmaa sms leh txt msg te nena inhmelhriat satliah ve mai khan, palai leh thu kengtu bera hman ka ching tawh a, thiante phone a ka sms pawh awm ngai lo thin kha, tunlai chu sms thawn chhuah ka ching lutuk a, a thenin ninawm min tia, thenkhatin inhmeh lo min ti bawk a, a then chuan ti ve vak vak zel suh min tia, thenkhat chuan ti zel rawh min ti thung. A then chuan min reply tha duh lo ngei bawk a, min biak chak loh vang leh midang biak tur an neih vang em em pawh a ni hran lo, ka bulah luck awm ang taka awm an duh vang mai a nia, an luck bik chuang lo tih ka hre reng sia, an hlawhchham chiang mai mai a sin aw. Mi thenkhat min mamawh chang chauhin, duat taka min kova min rawn txt thinte pawh an awm ve hrim hrim bawk a. Engpawh chu lo nise la, ka thiante vek in nia, ka ngai vek che u. Kan inhmuh loh changte hian lunglen thlak ka lo ti ve leh ringawt zela, sawrkarin lungleng lo turin thuchhuah a siam hran lo bawk nen, siam pawh nise lungleng lo tur chuan ka hlawhchham ve hrim hrim.
Hlawhchham sawi takah chuan, amah Mafaa dan takah “Hlawhchham ngei tumin thil ti ila, hlawhtling leh ta roh si ila, mi hlawhtling nge ka nih ang, mi hlawhchham?" tih te hi ka ngaihtuah vak zel. Ka sawi tawh ang khan tunlai chu ka buai thei lutuk a, heng a chunga ka sawi ang thu ho mai mai ngaihtuahna hun pawh ka nei lo. Hman niah pawh kan in chung zawnah thlawhtheihna a rawn thlawk a, kha thlawhtheihna khan eng nge a phurh anga, mi engzat nge chuang ang le tih ngaihtuah nan hunawl pawh ka nei hman lo. Heng thir hlum thlawk mai mai en nan hunawl ka neih loh vangin thlawhna thlawk pawh chu ka thlir liam ta ringawt mai. Thuziahte hi a har tehlul nen, ho mai mai ziah ngaihtuaha hun an hmangte hi ho ka ti, thu ho tak tak ngaihtuah nan hian mite hian engtinnge hun an hman phal zawk le tih hi vawiin chu ka ngaihtuah nileng zak. Kan thudang alai chuan, khawvel hi kan awmna hnuai atang hian verh tlang ta ila, chutah chuan zuang lut ila, a kaw lehlama kan chhuahin khawvelah tho kan la awm âwm sia, chuti a nih chuan: Khawvelah kan zuang lut nge khawvel ah kan zuang chhuak ni ta ang le?
Kan sualzia hi aw tiraw. Christmas hunpui a lo thleng a, “A thunawn chu lawmin khat” tih hi kan tui pui deuh thin nge maw ni, kan hla sak thin hi i lo chik ngai em, “Khawvelah hian Lal tamtak an lo piang ta a” tih hlate hi, “Chibai bukna rapthlak pek tumin an chhuak ta” tiin Isua thah an tum thu kan sa zo chiah a, “I hlim ang i lawm ang” kan tih chhunzawm leh hmiah thin chu a nia, kan sual ve ngawt mai. Heng lampang sawi takah chuan, kan mumal lo ve thin hi ka tia, “En rawh chhum zingah khian a lokal” tih hla kan sak hian, a lokal thu kan sawi tawh hnuah kan la sak lai rengin kan lo theihnghilh leh hman thin nge maw ni, a chang tawpah “Lo kal thuai rawh Lalpa Isu” ka la ti leh ham ham zel a.
Eng eng emaw ka sawi a, ka sawi tum tak pawh ka lo theihnghilh tep a lawm. Thil pakhat sawi leh ka duh a, sawi ngai sawi nawn leh thin ka nih loh vangin sawi ngai sawi nawn ching ho hi ka huat zawng tak an nia. Englo a nia ka sawi tum chu, amah Mafaa tawngkam takin “Sawi leh sawi hnu, sawi ngai sawi nawn sawi nawn hi ka duh lo tih hi ka sawi nawn leh duh a" tih hi....
Sawi chhunzawm zel chakawm viau mah se a tawpna siam a ngai bawk sia, chuti lo chu he lehkha chhiar hian i dam chhung hun i hmang ral anga, keipawhin ka titawp lo a nih chuan he lehkha ka ziah vang hian riltam pawhin ka thi maithei, thi lo maithei bawk. Chu lam chu tuin nge hria ang, Abraham Lincoln pawn a hre lo maithei. In thenawm pa pawn a lo hre zawk khauh maithei asin, a hriat leh hriat loh tuin nge hre ang ni, kha kha ni mai. Engpawh nise engemaw chang hi chuan i ngaihawm thin riau a nia. Imm, thil dang kan sawi kai leh ta, a tawp thei lo tak ngial dawn, ti tawp hmiah tawh mai ang.....
I thiana lo inchhal ve ringawt
Lawma Khiangte
No comments:
Post a Comment