LUANGLIAM (PART VI)

1. Hetiang khawp hian lunglen hi a lo na thei a ni maw. Duhtak, hmangaihna thu leh i hmingte hi ka ri hriatna bengah hian an khawk za a, ri zawng zawngah chuan rimawi ber an ni. Mahse hetianga min cham chilh reng a ni chuan, lunglen vangin ka nunna hian a tuar anga, ka thih hun pawh hi ka dam thleng zo lo ang tih ka hlau a ni.

2. Inthian zaho hian in mawi em em vek a, chung mawi em em zingah chuan i mawi ber. I chhe lo ka ti mai pawh a ni lo, kei chuan tha ka ti ber che. Dawihzep pawh min ti thin maithei, ka hrethiam lutuk, mahse i hmaah hi chuan inrintawkna ka tlachham thin a ni.

3. Reh reng thin mah la i tha reng tho va, ngawi reng mah la i la duhawm reng. Thinrim mah la i hmel chu a that ngaiin a tha reng a, i kâ chipin engmah sawi lovin ngawi reng mah la, i ngainatawmna chu a pangngai reng.

4. Aw khuangruah chiar nghian hian ka di ngaih lai a tizual e, bang teh se aw an run kaina min dal lo se. Ban zai a rel loh chuan thangvan rial rum leh khuangruahtui zawngte biahthu ka chah nangte, ka di te lunglen hnem a'n.

5. Ruah sur zawha khawthiang mawizia hi aw, amahin nunna hran nei ni awma mawi a ni. Mahse heng thilmawi zawng zawngte pawh hi i mawina nena tehkhin tham an ni lo ve. Khawnge mawina hi a awm a, thil nalh chu khawiah nge? Duhtak, i hmaah hian an hmai a uang zo em ilo enchhin ang hmiang.

6. "Engngatinge i rawn let leh tak mai le, ka hmangaih leh duhber min enkawl sak i intiam si a" ti a Angel ka zawh chuan, "Angel te hian angel vêk kan enkawl ngai lo atin ni" a ti a.

7. Khuarel hi tuin nge hrethiam ang le, kan hlimpui thin ten lungngaihna min thlen a, min tinuitu ten min vel leh si. Lunglen hnem theitu ten lung an ti leng a, beiseina min petu ten beidawngin min siam leh si thin anih hi.

8. Zan rei tawh lamah hian ngatinge ka ngaihzual zel che le, mi zawng zawng mut reh lai hian kei chuan muhil thei lovin ka ngaihtuah che a, khawnvar eng da lap hnuaiah hian i chungchang thu lo chu ka rilruah hian a awm lo a ni. Dawhkana kiu nghatin kut pahniha chal dawmin ka kun a, zawi sapin i hming hi ka lo lam nawn leh thin.

9. Zan boruakte hian hmangaihna thu an keng a nih ngai chuan, ka tana parvul mek khan thuchah a nei mial anga. Aw reh ri leh thawm nei lo te u in aw chhuah ula, ka di hmangaih biahthu chu min hlan turin ka ngen che u a nih hi.

10. Zan reia thawm a reh hnu pawhin ka ngaih che hi a reh thei si lo. I nui hmel kha ka mitthlaah chiang takin a lang reng a, theihnghilh tum chein awmzia a nei lova, hriatreng tum che pawhin awmzia a nei chuang lo, achhan chu ka rilrua i awmdanah hian thuneihna ka neilo a ni. Ka ngai em che tih bak chu hriat a lawi pawh ka nei rih lo.

11. Fur ruah sur ban lama ruahtui farfep fep hian i hmangaihna rawn keng tel teh sela aw, hei tunah pawh nangmah ka ngaih em em laiin an far ri leh tliar tliar asin. Thu engemaw tal i rawn chah lo ami?

12. Ka thu hriat hi eng thu nge nita le, nang nena nun hman dun a rem lo maw!! A ni thei dawn em ni? Leilung i rawl chhuah la, tupuite u, in fawn rite chhuahin rum hum hum rawh u, kei pawhin ka duhtak ka nei thei dawn lo. Hlim ula ka thik cheu anga, tap ula ka tah pui ang che u.

13. Ka bulah awm reng mah la ka khawih thei si lo che a, inbe reng mah ila engmah ka sawi thei si lo.I tel lo chuan mi tam tak zingah awm mah ila ka mal ngawih ngawih thin.

14. Engati nge rem leh lo tur chuan i lakah beiseina min siam le, min chhaih kual vel mai mai tur chuanka lo ring lo che a, ka phal bawk lo che, mahse ka lo ring sual che a ni. Ka chunga i tih ang hian midang chungah chuan ti ve tawh suh ang che aw.

15. Enga tinge ka rilruah hian i awm reng a, engatinge ka theihnghilh theih loh che. Nang nen nun hman dun duh mah ila, chu chu atheih loh tih kan hre ve ve si. Mahse ngati nge ka nun ti hreawm turin keimahah hian ser nung i siam tlat le.

16. Ka ngaihtuahna leh ka rilrute hi thunun thei ila chuan nang theihnghilh daih che hi ka duh. Neih theih loh tur awta hun hman reng ai chuan, theihnghilh daih che ila nun nuam zawk ka hmang thei tur. Mahse ka ngaihtuahna chunga thuneitu pawh nang i ni lehzel bawk si.

17. I thil sawi a nih vanga za lo chung pawh a nuih hi bansan hun ka nei thei angem le. Ih e, Kan inkarah hian engmah awm lo mah se, ka hriat laia midang tha i tih thu i sawi hian na ka lo ti thin.

18. Thiante an chhas te nen a hlim taka an nuih dar dar lai te hian a rukin ka muttui ka hru leh fap fap thin, ka duhna che hian awmzia anei thei dawn lo a nih chuan, a ruk a mittui hruk fo hi engtin nge ka bansan tak ang le.

19. Theihnghilh daih che ka tum chang hian, ka theihnghilh tawh che tih hi ka lo theihnghilh leh thin a. Tunah chuan hriat reng che ka tum tawh zawk ange, ka hriat loh karin ka lo theihnghilh che mahna.

20. Inhmelhriatna nei hran lo mah ila, ka hming chu i lo hriat tawh tho ka ring. Ih maw, mi mawl pakhat, nang hmangaiha duh em em tu che kha, kei mi mawl ve tho hian ka duh tlat a nih hi.