CINDY

Stage 1:

“Ka lo leng dawn nia, thingpui min lo lum”

“I lo leng dawn maw!!! Lokal rawh, tak takin, tui deuhin ka lo lum ang”

Kawngkhar tlemin a inhawng deuha, in-chhung lam pawh eng emaw chen a lang thei a. Patling thenkhat an lo committee avangin  kawtlaiah ka awm leh rih a. Ngatinge an inah committee a awm tihte chu min hrilh nghal mai loh le? Amah chu phone-in ka bia a, committee an nih loh thu a sawi takah chuan  inti ngampa deuhin ka lut a, an ina ka vawikhat lenna a ni a, in an nei nuam phian lehnghal.
 

Midang an awm ve nual avangin ngawih ka chuh a ni ber a, ngawih ka chuh tih lemah sawi tur ka hre lo a ni mah zawk. Sawi tur hriat loh chhuanlamah thuthleng sir khatah thuin chanchinbu ka chhiar ringawt a. Ka bulah a rawn thua, ani pawh a tawng tam lutuk bik lo, a khat mawi tawk an tih ang vel hian a tawng ve zauh zauh chauh a. A hnu deuhah chuan zawi sap hian, “Thingpui fe a awm lova” a rawn ti reuh a. A la upa lo nain a duhawm reuh a nia.  

An chhung zing ami pakhat, phawk zet hian kan titi min rawn zawm a. Amah chu kan nuih pui leh dar dar thin. Trigonometry chhinchhiah awlsam dan a sawi laite chuan, Chemistry Periodic Table thiam chhuak tura a thua kan phuah nasat thin dante ka hrechhuak rum rum mai. Mathematics chungchang a sawi laiin  Cindy chuan hmai zangthal ha hian, “Mathematics ve tho tiraw i nih, a sawi hi a dik em?” a ti a, engtin mah chhang lo chuan ka kiai sak ringawt a.

Sana ka en a, a hma tawh lo.

“Ka haw dawn” hei a tlai tawh sia..??”

“Ngai lo a la hma, kan meng rei thei lutuk, leng rih rawh...”

Tawngkam tha umzuitute zingah ka va tel chak ve le, mahse rei thu tawh lovin ka tho chhuak a. “A la hma eee” tih pahin a rawn thova, kawngkhar kan pelh chuan ka bana rawn chelh pahin, “Lo leng leh la” a ti zawi sap a. “Ka hman veleh aw, i ngaihawm sia”, ka ban a vawnna pawh a thlah chuang lo, muang changin a pen chhet chhet a. A biangah ka fawp zauh a, mak tih hmel deuhin min en ha a, mahse a mitmengah chuan huatna a tel lo tih ka hmu thei. “I lo dam dawn nia” tiin ka mangtha a.

Cindy hi naupang fel tak a ni thin. An school-a ka thawh laiin anmahni batch hi kan zirlaite zingah chuan a pawl sang ber an ni a, khatih lai khan naupang thuawi leh thiamthei tak a ni thin a. Zirtirtu ho pawhin beiseina sang tak nena kan vauchher kha a ni. Tunah chuan a nula ve ta.

Thui pawh ka kal hmain ka phone a rawn ri a, Cindy message a ni. “U Jess, tinge khatiang khan i awm a?” tih zawng hi a ni a, “I duhawm viau a nih kha” ka ti let ringawt a. Tunah hian thil dang ka ngaihtuah ti ila, dawt sawi ka ni ang. Mut hmunah phone ka khawih niap niap a, amah bawk chu ka ngaihtuah leh thin. Thlifimin thinghnah a rawn chhem rik zawng zawngte pawh chuan lung an tileng zo ta.

Motor horn ri tuar tuar(h)-in min tiharh a, inhnial riin a zui nghal bawk. Zing kar karah tute nge le? Pawnah chuan an lo ding bial laih a, 407 leh pickup hi kawnglaiah insu lek lekin an ding bawk a. An bul ka va thlen chuan Motor light kehthem kawngpuia lo darh niai chu ka hmu a, he mite hi an insu a ni khawp mai. Zing karah zu rim an nam thur thur lehnghal a, mi pawh kan pung chak na-ngiang mai a. “I tlan chak lutuk a nih kha” tih chu an thu inchuh a ni.

Kan hnung lam atanga  “Kha... enge a awmzia” tih ri pawh chu tuman kan ûksak lem lo a. “Eng thil nge thleng, in insu elaw” tia thu pe aw taka a rawn sawi nawn leh hnu chuan chupa lam chu kan hawi thap a, Traffic police a ni. A bike side that mawlh mawlh pah chuan, “Fimkhur hi a tha asin” a ti dam thlap a, a aw chu dam viau mah se zahawmna leh thuneihna a keng tel tih tumahin kan hai lo.

Thla la ve hrim hrim ang. Phone ka lek chhuak a, Cindy message a lo awm reng a,

“Ka nau pum a na a, damdawi inah kan awm mek”

Thlalak lam rilruah a lang tawh lo, ka insiam sawk sawka damdawi in lamah ka kal nghal a. Varanda ah chuan ngaihtuah nei tih hriat takin a en ngai enin a lo awm reng a, min hmu ang pawhin a lang lo, aw ka  thian kharh a,

“E, i lo kal law, i van fel”

“I nau chu eng nge a an a?”

“A zia deuh tawh, nachhawknain an chiu a”

Varandaah thingpui in pahin kan inkawm a, a chhang eina hmui mawm hlap chu nalh tak a ni. A tawng siam siam renga, mit tla lo lekin ka lo en leh reng thin. Ka kalsan dawn chuan gate thlengin min thlah a,

 “Zanah lo leng la, nizan i haw hma sia”,

“Nia kan tum dawn nia” ka ti a, a biangah ka piai zauh a.

“Ni, hman nuam aw”, he nau han duhawmzia hi chu aw.

Hun awl ka neih apiangin ka leng thin a, kan inzui chhuak zauh zauh bawk. Hla lutuk a nih loh chuan bike kan keng ngai lo, ke-in kan inzui dun ral ral thina mi dem leh fiam kan hlawh zauh zauh tawh. Pawi ka’n ti lo mai mai khawp a(h). Mahse buaithlak ber chu, kum upa zawk si hi a bula ka lai deuh tlat zel.

Kan khuaah Mela a rawn awma, keini pawh chuta kal tur chuan kan chhuak a. Kawr sen dang a haa, a jeans nen chuan inchawih tak a ni. Gate kan luh hnu rei lo teah Magic show kan en nghal a, tlar hmasa berah thuin  amah leh Magic show chu ka en chhawk chhen a ni deuh mai. ‘Khawi nge hmuhnawm zawk’ min ti sela, chhan har ka ti ngawt ang.

A vir chi-ah kan chuang leh a, hnuai lama kan tlak thlak leh dawn chiahin kan za chuai chuai a, achang leh a mit a chhing a, min pawm bet tlat thin. ‘Vai hoin kan tawng an hre chuang lo’ tiin an awm laiin kan sawisa vak vak a, anni chuan inngaizawng infiamah min ngai ringawt awm sia. Vai mipa hmelchhe deuh a hmuh apiang in “Saw i unaupa” a ti ziaha, achang leh a tlanchhe der a, kan hlim a ni. vai hmeichhe hmelchhe deuh kan hmuhin kei pawn ka ti ve tho...hahaa. Vawiina kan awm dan hi thawnthu leh film-te pawh a ang zawk lek lek, mahse a nuam a ni.

Stage 2:

Inngaizawng khawsak pangngai chiahin kan khawsa tawh a, whatsapp ah kan inbe awl lova, Message min reply lawk lohte hian ka lungawi lo lek lek thin. Hmaichhana mipa dangin an rawn biakte hian ka lo thik hman ti tih ziah.  Ni e, amah hi ka ta nisela ka duh a, ka thil neihte zingah a hming hi sawi tel ka duh a ni. Christmass hunpui kan hmang dun thei lo tur erawh ka huphurh takzet a ni. He hun ka nghahhlelhna zawng zawng a bo vekin ka hria. Mahse mihring hian kan duhthusamah thuneihna kan nei tlem viau si. A pu-te khuaa hmang turin kan inthlahliam a, a lan theih chhung ka thlir a, ani pawhin tukverh atangin min rawn thlir reng a, kan inthlahlela kan huphurh a ni.

Cindy a kal hnu chuan kan khua hi a ngawi dûk a, thawm bengchheng awm ve thin mah sela a reh a ni. Tun hma aiin nite hi a rei zual a, zan lam pawh chu ti tho. Lenna tur ka hre vak lo bawk nen, kan venga miithi an awm avangin khawharinah ka kal deuh chawt a. Ni e, lusun khawhar hnemin tlangval khawhar ka kal a nih ber hi. A khat tawkin kan awmdan ka hrilh thin a, a khat tawk tih lemah a khat tawk aia zingin a ni mah ang. Khawhar inriak pawh kan kim thawkhat tawh, fiamthu thawhin kan ri dar dar a, hetih lai pawh hian kan inbe reng a. Lukham bulah phone hnutchhiahin tui in turin ka thawh san a, muthmun ka pan leh laiin ka phone chu a ri tleng a,

“U Jess, thil ka zwt ag ce w”

“Immm”

“Min duh miiii”

Ka rin loh lam daih a ni, “Aw ka duh che” tih nghal mai ka duh. Message ka type mawlh mawlha mahse signal a bo daih, a va hun lo thin tak. Signal awm ruala ka hmuh hmasak ber chu “Kei chuan ka duh che” tih a ni, nun hi hlimna a lo ni e. Ka bula mute chu ka en a, kan thil buaipui inang lo mah se, zanin hian tumahin ka pawi an sawi lo, min beng pawp mah sela ka thinrim lovang, ka hlim a ni. Mahse hlauhthawn ka nei, hmangaihnaah hian vawikhat ka pen sual tawh, tihsual nawn leh ka duh tawh lo. Eng angin nge min ngaih hriat hmasak ka duh,

“Duh ti ta ila”,

“Chutiang ringawt chhanna a tling a mi?”

“Nih leh duh lo ti ta ila”

“Ta ila tih ringawtte chu a, swi tehhhh”

He nau tak hi chu aw, zirlai thiam thei leh zawhna logic deuh deuh pawh chhang pap pap thei kha a ni miau alawm.

“Imm Ka Duh che”... Ka hlim a ni. An schoola ka thawh laia zawhna a chhan zat zat laite ka hrechhuak a, ka kiai sak a. Zanin hi zan duhawm a ni.

Ka rilruah thil pakhat a lo lang zawk a, a logic mind kha test leh ka chak riau,

“Ngaihzawng nei lai ni ta ila, pawi i ti lo ami”

 “Pawi ti mah ila, i nun a nia” tiiin min chhang ringawt a. Mate, ngaihzawng ka nei lo. Ka nuna nghah ka neih hi nangmah hi ni tehreng la aw.

Kan inbe chhunzawm char char a, ama sawi danin an schoola ka Patea ai ka kal lai khan min lo star tawh a ni awm a, “Ka be ngam lo che a” a ti mai a, ngatinge ka lo va’n hre har ve. A ngaihzawng hnuhnung ber nen September thla khan an inthen tawh a, chu pa chu tunge hriat ka tum lova, hriat pawh ka chak lo, a hnuhnung ber nih ka duh mai chauh a ni.

Cindy-te zirtirtuah ka tang tawh ka’n ti mai pawha, kan kum erawh a inthlau tam lo. Class 2 leh Class 8 ka bawh kan a, kan class ah a naupang ber ka ni thin a. Ka vanneia, zirtirtute duhsak ka hlawh thei thin hle. Pathian zarah ka zirlai ka zo ve tep tawh, tun atanga hun rei lo teah hian ka research hi ka zo tawh dawn a, chu chu ka tan chona a ni a, khawvel thar hmachhawn turin min hmuak mek a ni. Chutih lain Cindy a rawn lang a, amah avang pawh hian research hi zawh hlan ka nghahlel thin.

Stage 3:

Zan dar 6:30 a ni a, ka insiam mawlh mawlha, ka phur a ni. Christmas leh kumthar hunpui chhung zawng kan inhmu tawh lova, zanin hian kan inhmu leh dawn chiang alawm. An inah ka tlangnel deuh tawh a, midang an awm ve lai pawhin a hma anga ngawih chuh tlat ka ni tawh lo. Rei pawh ka la thu lo, sitting roomah chuan kan pahnih chiahin kan awm tawh a. Kan inhmu lo rei tawh nen, tawng kan inchuh a ni deuh ber a, a chang leh engmah sawi lovin kan hmuiah thuruk kan inhrilh a, khawvel hi a nuam a ni.

A bulah a tam thei ang ber hun hman ka duh a, mahse ka duh angin hun tam ka nei thei thin lo. A hlimna siam ka duh a, chu chu ka thil thiam loh ber a ni si. Ka awm anga lan tawp bak hi thiam ka nei lo. Mahse, amah hi amah a nih phawt chuan ka duh a ni. Ka ngai a, a hriat miah lohvin min thunun chiang khawp mai. “Harhfim” tih thumal keimaha a awmchhung chuan ka ngaihtuah a, zan mutna ah pawh ka la mutpui zel fo va. Zangthala ka mut leh zangthal zawngin ka ngai a, ka saisir leh saisirin ka lung a leng zel a, ka bawkhup a nih pawhin amah ngaihtuaha bawkkhup tho ka ni.

“U jess, Sangtei te inah chaw ka eia ka haw mek”

“Tinge min lo hrilh loh, thlah i ngai em”

“Ka lo tibuai hreh che a, hei ka thleng tep”

Zan zanah lehnghal mahnia haw chu aw,,, min hrilh lo chu ka lungawi lo lek lek.

“U Jess, ka thiante buaipui an ngai a, in pawh ka la thleng lo”. Ka ngaihtuah telh telh mai, chanchin ka zawt chiang vat a, an dawra an thawhpuite an lo ni a, an chaw eikhawm an rui lutuka an haw thei lo a lo ni a. A chhungte a hrilh hreh bawk si keimah min rawn hrilh a lo ni.

“I chhungte chu dawt tel lovin thudik i hrilh dawn nia, dawt chu a tlo lo a nia”

“Min hau ang”

“Dawt i sawi chuan i inchhir zawk ang a tha lo, hrilh tawp rawh, ka lokal mai dawn mi”

“dwr ah an riak mai dwn, ka hw sn”

Ka ngaihtuah tellh telh a,  a rui ve angem le? Ka hriat lohvin a lo in ve thin reng ang a? Chutiang mi niin ka hre bawk si lo. A hnu deuhah  “Ka thleng, i sawi ang khan ka hrilha, engtinmah min ti lo” a rawn ti a. 

“I in ve em”

“Ka in i ring ami?”

“Ring lo ve”

“Hmmm, I rin vangin min zawt nih kha, ka in ngai lo”

Stage 4:

Ka kal chhuah a hun leh tep tawh. Tum dang ang chu ni sela chuan phur takin research chhunzawm tur hian ka kal ang, mahse tunah chuan Cindy kalsan hi ka huphurh a ni. Ani’n min chelh lo mah se, min chelhtu chu amah a ni si. Hun remchang ka neih apiangin amah hmu turin ka kal a, mahse a hma kha a ang tawh lo riaua hriatna ka nei leh thin. A chang leh airtel signal awm reng lai hian signal nei lovin a awm leh reng thin a, an inah signal a tha viau tho bawk si. Amah hi ka hrethiam lo telh telhin ka hria.

Zankhat an ina ka leng chu midang an lo awm ve a, ka cousin-te an nih hi a ti mai a, an innel phian lehnghal a, hetiang taka unau an inkawm ngeih a nih chuan a nuam ngawt ang. A cousin mah ni se ka thik lek lek, zan dang aiin min ngaihsak lo riauin ka hria. Mahse chutiang lam zawngin engmah phei chu ka sawi duh lem lo va. Dawhkana lehkha awm chu kan inthleh siaka (naupan-chhiat thlak a nia) a lai takah vawi sarih aia tam thleh chu kan tum char char a, mahse kan hlawhchham chiang hle, “Ka van thei awm e aw” tiin kan ti nawn leha, kan thei chuang lo kan nuipui ringawt a. A nihna takah chuan a cousin nen an inbe tam riauvin ka hria a, thil dang tih ka rawt a ni.

Kohhran hlim lai a ni a, inkhawm pawh kan rei deuh tlangpui a, zankhat kan inkhawm bang chu Mami-te inah thingpui inin kan chawl khawmuang a, ina ka haw leh chuan ka phone charge chu ka la a, Cindy miss-call 2 leh message a lo awm a, message chu ka en leh a,

“Tinge ka mamawh lai che hian i awm ngai miah loh le”

Ka hrethiam lo tak zet a ni, inkhawmnaa phone ka lo keng ta lo kha aw. Engvanga a mamawh laia awm lo nge ka nih. Ka call let a, a ring ral thak a, ka call nawn leh a, mahse ka call chuan pick-up tu a nei lo. “Enge a awmzia” tiin ka message a, chhanna ka hmu chuang lo, ka ngaihtuah tak zet a ni. A chungah enge thleng ang? Ka call leh a, midang a bia tih hriat takin a busy a. A hnu deuhah chuan, “Engmah a ni lo, mu tawh rawh” tih zawng hi min rawn thawn a. Engnge thil awmzia hi ka hre lo a ni, i rilru ka tina ami ka tih lahin, ‘chutiang a ni lo, mutawh rawh zan a rei tawh hi’ tih bak chhanna ka dawng lo. Lalpa, tihsual ka neih chuan min ngaidam ang che.

Ni telin kan inbe tam lo tial tial a, sms a reply lo fo ta bawk. A buai aniang tiin mahni ka inhnem chawp ringawt thin a. Min reply lo mah se sms ka thawn awl chuang lova, ka rilruah a awm tih hi hria se ka duh a ni. Ka kal hun a lo thleng a, research chhunzawm tura ka phurna leh ka peih lohna a inbuk tawk vel ang. Cindy chu hunawl ka neih apiangin a chhiar turin sms ka hnutchhiah thin a,  reply erawh ka dawng khat ta khawp mai.

Nitinin ka ngai zual telh telh a, Kan kar a hla si a, thlifim thaw heuh heuhte hi thu an chah theih a nih ngai chuan, a hnena sawi tur ka neihte hi hlan chhawng turin chah ka van chak tak em, khawkhatah kan awm tawh bawk si lo. Biak ka tum lahin biak theihin a awm ngai bawk si lova, a chang leh ‘min hua a niang’ ka ti leh ringawt a, mahse chutiang chu ka ring phal chiah si lo. Tunah chuan duhsakna thu thawn bak atan tih theih ka nei rih lo a nih hi. Ka research ah rilru zawng zawng pek tumin ka bei a, tlai lam ni tlak dawna ka hriatchhuah ziah erawh ka la sim thei chuang lo va.

Laboratory-a ka awm laiin sms ka dawng a, “Cindy-te kha an inru.. i hre tawh em”. Chu sms chuan min deng dawta, ka nghilh dupa ka en ngai ka en tlawk tlawk a. Hetiang tak hian a ni maw ka lo duh hman le. A thianghlim leh thianghlim loh ka zawh  laia min chhân dante ka ngaihtuah chhuak uai uai a. Ka na vawng vawng tih chu tuna ka hriat awm chhun a ni. E ni leh lo, bumin ka awm tih pawh ka hre tel. Cindy, a va mak ve maw leee!!!!

Rilru na chunga research work khawih chu a sawt duh lo khawp mai. Ka Guide-in “Tunlai hi tinge i va nguai ve” min ti zauh zauh a. Mipa takin ka hliam tawrh hi tawrh chhuah ka tum a, ka lo thup zo thin lo pawh a ni mahna. Hun a tawlh a, Cindy erawh ka theihnghilh thei lo. Hriatrengna hi nun tihlutu a nih ngai chuan, ka nun tihlutu chu hreawmna leh khawharna hi a ni ang. Engpawh nise ka research-ah hian theihtawp ka chhuah phawt a ngai a ni....