AMAH KA PU KHA

"Silai kha han la teh, Vahrit an awm thin a"

         Luikal leh ramvah nuam timi tak a ni, a chanchin sawi uar deuhte chuan, kham atang pawhin len a deng thin an tih chu. Mi lungleng mi tak a ni, thla eng hnuaiah no mawng leh dumbur khawng ringawt a zanlai thleng rawk a zai peih thin ngat kha a nia.

          Amah ka pu Chhuana kha, Vahrit sa eitum ngeiin silai a pu chhuak a, nidang a a kalna ngai tho zawh leh in, thawm ngaichang ranin a pen chhat chhat a. A ding chawt a, ngun lehzualin a thlek nawn leh a, Immm Vahrit ngei an ni, a tuihang hawp tur a awm tawh ngei dawn e...

Vahrit kah nana silai a ken a dah lawk a,

TLAN RAWH

\\ Genesis 19:22 Hmanhmawh la, chutah chuan tlan rawh; chu mi i thlen hma loh chuan engmah ka ti thei dawn si lo a //

Chhandamtu Isua pan ang che
Hruaitu leh vengtu che
Harsatna laka min awmpuitu
I hmangaih hmaa hmangaihtu
Hei ai hian, hei ai hian a ropui ani
Ringhlel lovin amah pan mai ani
Hmanhmawh rawh, hmanhmawh rawh, hemi ah erawh
I chhungte hruai la, Isua um rawh

I nun theih nan tlan rawh
Isua lamah tlan rawh
Hnung lam i hawi kir a nge
I thleng hman lo a nge

Chhandamtu Isuan a sawm a che
Amah zuitu rinawm ah a duh che
Nghet takin a ding reng
Engkimah min dawh thei reng
Hei ai hian, hei ai hian a mak ani
Khawvelah hian amah rin mai ani
Muangchang suh, muangchang suh, hemi ah erawh
I hmangaih hruai la, Isua um rawh

I nun theih nan tlan rawh
Isua lamah tlan rawh
Hnung lam i hawi kir a nge
I thleng hman lo a nge

Tlan rawh hawi kir tawh lo in
Tlan rawh nikhat chu i la hrethiam ang
Isua hi, Isua hi chhandamtu a ni.........

ZINKAWNG KHAWHAR

Lalpa ram tulna chuan min tir si a,

Hringnun lunglen a bo si lo.

Krista zara ka lenrualte kha

Ka kiangah awm teh sela chuan,

Mittui chauh lo hian lunglenthu ka sawi tur.

Khual khua kaiin lenkawl ka liam a,
Thiam zir ziah puanah hian,

Khawhar leh lunglen thu ka thai leh thin.

Vana arsi de sep septe leh,

Thlifimin thinghnah a chem rik seng sengte tal hian,

Min hmangaihtu, ka hmangaihte thuchah rawn keng teh sela aw.

Ka nuna thu neitu ni tehreng ila,

Ka hmangaih, min hmangaihtute kiangah hun ka hmang ve tur a.

Mahse leia hlimna avang mai a,

Lalpa mittui far tur chu ka ngaingam si lo,

Ka Pathian min awmpui ang che.

Ka liam san Kristaa ka unau ten nen khan,

Rosum chhuan tur kan nei lo,

Mahse rosumin a lei phak loh hmangaihna nen,

Hringnun kan chhiar si a.

Engatinge hmangaihna siamtu hian,

Inthenna a lo duan tel le?

Khawharna mittui hi intawnna ni sela chuan,

Rual kimin kan awm tlang awm si a,

Intawn nana khuarei nghah chu a rei dawn mange.

Lalram tulna ka vavaihpuite u,

Tunah tap chungin buh chi fehchhuahpui mah ila,

Hmangaihna siamtu hnen kan thlen hunah chuan,

Kan intawng kim leh anga,

Inthen tawh lo ang u aw.

Leia lungngaihna leh khawharna mittui pawh hi,

Lawm vanga lungchhiain kan la tahpui zawk mahna.

Ka Pathian, min awmpui mawlh ang che.

KA DUH LO

Duh ka nei lo,
Tumahin min duh bawk hek lo.
Chhai ka nei lo,
Tuman min chhai lo.
Tumah ka awt lova,
Awh neih ka duh bawk lova

Ka duh lo tih tawngkam hi,
Hman ka duh lo a ni.
Duh lo tih hi ka duh lova,
Duh reng duh lo tih pawh ka duh lova.
DUh lo tih ching bula awm ka duh lo.


Duh loh avanga duh loh zawng
Duh lo tih mawl tawp pawh ka duh lo
Duh loh vanga hnawl nih pawh ka duh lo
Duh lo tih sawi sawi pawh hi ka duh chuang lo.

CHHAWNTU AWM MAW

Chaw eikhawm ila,
Pawi hleinem.

                 A ngaihawm ve thin ngawt mai, rawt lawk pawh awm lem loviin kan ti leh tawp thin chu a nia. School pangngaia kal lai chuan thian zaho kan inhmu khawm dial dial thei a, kan han chhuak hlawm a, manhi tuina zawng leh mahni kawng zawn theuhah kalin, kan darh zo ta. Hmun danga zirna chhunzawm te leh mahni hna tul vanga awm sawn tate an kir leh chang pawn, kim tak tak a awm thei tawh thin si lo va, an ngaih em em leh hmuh an chak ngawih ngawihte pawh hmun dangah an lo awm leh tawh thin si a, in thian tha a, inkawmngeih turin kan in tawnga, inhre reng tura inthen a ngai leh si.   

Lunglen zunin a phuar nunhlui ngaiin,
Rualduh leng zawng an liam zo ta.
Sawilai mi u leh lenrual hlui vaiin
Iang zo ta e, tlang hril Lalzo fam ta.

Chhawntu awm maw, lunglen zun zam chhuakin,
Hmun hlui zawngte fan zai relin khuachuan ê,
Awmhar huiva iang sul hlui fang chhuakin,
Nunhlui ngaih zunzai sain a kur e.

Tlangthan dawn lo sul hmun hlui fang zel e,
Engtin dawn ve ang maw, lenrual hlui zawng khan?
Auh ruai a nuam nunhlui leh rualhluite,
Luaithli nul ve ang maw rualhlui zawng khan?

Aw khawiah nge suihlung rualpui zawng kha?
Mawiten vangkhua suar ang pal za tawh hnu,
An chuaita em ni chhuihthang lawhleng kha,
Mahten dawn zai a rel kumsul liam hnu.

A dawn seng lo rualhlui biahzai hlanlai,
Vangkhaw sul nghak a tawng thei mawlh si lo.
A van ruai ruai, a hlan lunglen biahzai,
Lungrualna vangkhua vul zai a rel lo.

A lunglen hnemtu perhkhuang chawi zai a rel,
Khuachuanin nunhlui ngaih zunzai a sa.
Hramthiam sirva ten zaipui zai an rel,
Iang zo ta e, hmana Buizo zai sa.

A pawi mange thenna kawl en vang hian,
Ngaia auh ruai a tul thin nunhlui te,
Tawn leh ni her ang maw lenkawlah khian?
Engan Khuanu paw'n thenna a duan le?

HMANGAIHTU NGAI

Nguinain min man chang hian,

Nang ka kiangah awm ang che,

Tanpui ngaia ka awm lai hian,

Lalpa nangin min pui ang che.

Harsatna ka tawh thinte hian,

I hmel min hmuh tir zel sela,

Hreawmna ka tawrh changte hian,

Nangin min thlamuan zel la.  

Thinlung chapo hian min ei chhe thin,

A tawktein ka chungah nangin rel la,

Thinlung tlangsang hi ka tlukpui thin

Nangin min veng tlat la. 

Hmabak hlen tura ding thei turin

Nangin chakna min pe zel ang che,

Hmelmate nena hmangaih thei turin,

Nangin ka thinlungah thu nei ang che.

Retheia ka awmin min theihnghilh lova,

Min thlahthlam ngai lo, mamawh chhanna i ni.

Midangte tan malsawmna nih ka duh fova,

Lalpa, nang malsawmna bul I lo ni.

Ka ka hian mite pawi a sawi lohna turin,

Lalpa nangin min ven sak ang che.

Khawvel mawina a pil lo turin,

Lalpa nangin min chelh ang che.

Ka mangan lai hian nangin min awmpui la,

A ni, ka hlima ka lawm lai pawhin.

Ka chunga thil lo thleng hi pawm dan min zirtir la,

Ka theihnghilh lohna tur chein.

Ka duhthlanna te hian I lam lo hawi sela,

Kalna kawng min kawhhmuh ang che.

Nangin min hruai la, min chelh reng la,

Vanram thlengin mi  hruai ang che.

A CHHAN NANGMAH

Ka beisei awmchhun chu nang i ni e.
Ka tahin min thlem a, ka nuihin min nuihpui a,
Mittui sengin min vel thin, mahse lawm vangin.
Engtikah emaw chuan,
Rulh let hun che ka nei mahna,
Chutih hunah chuan ka pawm che anga,
Mittui sengin ila nui ve ang.

Ka nuna i lo luh khan,
Ka tana thi tawh hnu khawvel i kaitho a.
Ziak loh zirlai min zirtir a,
A chang chuan beiseina beidawn thlak nen,
A changin ka tap a, ka nui a, ka tap leh a.
Mumal awm lo mumal min neihtir a,
Pangngaia ka awmlai mumal lovin min siam leh si.

Ka tan i hlu, ka ngai a che.
I hming remin ka kal a, ka zai a, ka titi a,
"Enge i duhthusam", tiin min zawt sela,
Nang nena nun hman dun tiin bul ka tan ang.
Ka mit hian ka thinlung a thik fo thin,
Rilru i luah lai pawh a ka hmu thei lo thin che hi.
Engtikah emaw chuan ka la tap anga,
Mittui sengin rawl pawh ka chhuah mahna,
Mahse nang i awm chuan ka nui leh ang.
I awka hi dampui thin mah ila,
Hmangaihna mita min en hian tuar a har thin mange.
Rimawi leh hla ten ka tan awmzia an nei leh tawh a,
Tho tur awm lo min kaithotu i ni e.

Min zui thintu chak lohna pawh hi,
Nang chuan hmangaihna vanga tlawmnaah min ngaih sak a,
Ka tha a zuaiin chakna min pe thin.
Mahse maw, hetianga min dawm reng chuan,
Chakna min pe thintu i hmangaihna hi,
Engtikah emaw chuan ka la chauhpui zawk mahna,
Mahse nang i awm phawt chuan,
Beiseina thaw ka la fân ang. 
Duhtak ka ngai che...

PASTOR FANU

  

“U Lawm, thil tha deuh hrilh tur che ka nei”.

“Eng maw, sawi la”?

“Aaa, ka duh leh lo e a”.

A thiante awmna lamah a phei lehnghal a.

A girl one day:

I hman tawh em, an lo thleng tep tawh ang, ka lo va kal ang, i lo phei vat dawn nia.

Aw le.

Min bialtu Pastor te an insawn tawh a, vawiin hi Pastor tharte lo thlen ni tur a ni. Ka thlen phei chuan an lo awm nual tawh mai. Sir khata herhsawp thutthleng hniama thut pah chuan, an titi kar lakah ka lo nui ve zauh zauh a. Kan thlang lawk atanga zai ri riai riai chu, ka ngaituah zui neuh neuh a.

"Hei, tho teh, tho teh, an lo thleng a nia"

Suangtuahna ka lo kawm veng veng alawm le. Motor lam kan pan sap sap a.

A na lutuk, ka bing mup mup, ka kezungpui tin kar thi tiam tiam dawm pah chuan ka thu ta ringawt a. Tunge maw he laia lung lo dah kher kher ni. Kal bai sawih sawihin khual chhawn a ngaih phah.

Kan inchibai sap sap a, thianpa Rla duh ang ngeiin kan Pastor chuan fanu a nei e. A hmelchhe lo viau lehnghal, a la naupang deuh tih mai loh chu, a la tlangnel loh vang a niang, han biak vel paw'n a la kimki cheih cheih a, a tiduhawm phian.

My Idol:

Khaw thenawm maia Bial Inkhawmpui hmang turin kan inpuahchah a, solo competition a tel tur ka nih avangin, biak inah min zai tir chhin a. Ka zai zo kut benga min lawm chu ka en phei a, midang zawng aiin Debie chuan a uar in ka hria, a duhawm reuh tawp. Nge nia ka lo ngaih bel mai mai zawk.

A hun a lo thleng a, Thianpa Rla chuan, "Zam suh a ho lutuk, banah thil i show ang" min tingawt mai a. Engemaw thil avangin, kan category ah mi 2 chiah kan zai dawn a lo ni. Ka elpui tur chu vengkhat nula zaithiam tia sawi a ni a, ka huphurh ve hle. Kan han zai ta a, zam tak chungin kan tling tla ve mai a. Thuthmun ka thlenin Debie chuan, "U Lawm, i zai tha lutuk, a nalh bontop" nui seih pahin a ti a. He nau hi a duhawm reuh a ni, ka zang huaiin ka hria. Result an rawn puanga, mi pahnih inzaisiakah pahnihna ka ni. Prog a zawh chuan Debie leh a thiante chuan kan thutna an rawn pan a.

"U Lawm, i thiam daihzawk a nia. Kan idol i ni".

Rilru a hlim veng veng, la nau viau mah se, a hmel hian suai a nei tlat.

"In va'n tilawmawm, hawh u, thil ka lei ang che u"

Chumi tlai chuan kan awmho ta reng a.

Eye contact:

A karleh zirtawp zan chuan a ngai angin, Chanchinbu chhu turin Quarters kan pan hlawm a. Kohhran news kan lakkhawm laiin, Debie chuan lehkhabu nen min rawn pana,

"U Lawm, hei hi ka test dawn a, ka hrethiam lo, min lo hrilh",

"Khawilai, e ngawi lawk aw, tui lo suak lawk la".

Ni e, lo inhrilh tak teh u, har a ti deuh thin a, a nu chuan a rawn ti a.

"Kha tui, khawi min hrilh tawh rawh"

"Lo thu la, Alzebra chu a har hleinem, uluk deuhin lo en la, i hrethiam mai ang. x hian a piah ami hi i puntir anga..."

Ka en a, keimah zawk min lo en reng a. Lehkhabu hi enrawh tiin a darah ka vuan a. Aw, tih pahin a en lehnghal mai bawk a. A hrethiam ta aniang, a hnuai ami te pawh a chawk zat zat thei tawh.

"Ka lawm lutuk, thingpui ka lo siam leh ang che?"

"Siam duhtawh lo mai rawh, chanchinbu an chhu zo tawh tho a, kan haw mai ang, mut a chhuak dawn tawh a"

Debie nen hian kan inngaina tawn hle a, engemaw hnatlan nikhua pawn ka bulah a awm ve mai thin.

TIME TO SAY GOOD BYE

“A la rei lo viau emaw tia, khawnge Pastorte chu an sawn dawn a”?

“Ka chiang mai bik lo, khawpui hnaivai deuhah niin ka hria. Min lo sawm phei dawn nia, ka lo va inbual ang”.

Rla phei hnu chuan ka inngaihtuah lungleng thar a, kan Pastorte zinga ka la nel ve ber ten min chhuah san leh dawn chu a ni sia. An chhung an fel tehreng nen ka ui ngawih ngawih.

Rla te in lam pan pahin dawrah thil leiin ka khawmuang zawk a.

"U Lawm, min lo nghak", Debie leh a thiante an lo nia.

"Tinge, in ina lokal kan tum a, khawnge in kal a"

"Sawtah api Muanite thil kan pe lawk a, U Lawm in ngaihawm dawn e"

"Nangni alawm ngaihawm dawn, in awm hla tawh dawn sia thil lei ang u aw,engnge kan lei ang"

A thiante pahnih in an duh an lak hnuin,

"Chocolate" a ti zawi sap a.

Rla pawh sawmchhuah hmain a rawn thleng phei leh a, Debie te inlamah kan inzui phei diah diah a.

An chhuah dawn hnaih chuan, Kawtchhuahah chuan kan ding thap a, a thenin mittui an hru fap fap bawk. Zui ve thei ila kan Pastor te hi zui ve ka chak thlawt, mahse ka thei ve si lo.

Debie chu ka bulah lokalin,

U Lawm, thil tha deuh hrilh tur che ka nei.

Eng maw, sawi la?

Aaa, ka duh leh lo e a.

A thiante awmna lamah a phei lehnghal a.

Motora an lawn hnu chuan, mittui tling piau vin "Mangtha, lo zin ngei ngei ru aw" a ti a, hnuk a ulh teuh mai.

Nangni pawh dam takin, Mangtha u.

A message one day:

Phone message tone a rik chuan ka hawng vat a, Mawitei a lo ni a

"Thl hrlh tr ce k ny a nya"

"Enge a"

"ih, Deby'n a * ltk ce, a hrlh gm l ce a"

"A va tilawmawm ve, a dam zel maw"

"w dm, a swi reg ce, a khtlym tp"

"Kan inbe tha dawn nia, hei tihtur awm lawk a, nakinah aw"

Debie, tleirawl duhawm deuh kha. Ka bula a awmdan thin ka mitthla uai uai a, zakzum taka a kimki cheih cheih lai pawh hei fiah deuhin ka la hmu. Mahse, Debie, kan va inhlat ta si em

KA THIAN

 
Kan la upa zel anga, nakinah chuan keimahni zawn theuhah thildang buaipui hman lovin kan buai twh ang, kan tha leh zungte pawh kan tu leh fate tana hmang zovin thiante kawm nan hun kan nei tawh dawn si lo. Chu tih hunah chuan hun lo tak taka kan in missed call thinte, thu ho tak tak sawia rei tak tak kan inbiak thinte, sms ho tak tak kan inthawn kual thinte hi kan ti ngai tawh lo anga, eng emaw changa kan ngaihtuah chhuah changin "Kha tih hunlai kha chu aw" tih bak chu chan kan nei tawh dwn lo. Kan hriatchhuah a kan ngaihtuah let chang chuan tukverha dak chhuakin, nui sak pahin kan biangah mittui ala luang ngiai ngiai ang a, chutiang hun kan thlen hnu pawh chuan, THIAN ka la ti fan ang che.

      Thil ho tak tak kan hlimpui thinte, rilru hah chunga kan nuih vak vak thinte hian min la kiansan anga, khawvel vir hian hun tha a herchhuahpui a nih chuan, athen a zar chu kan la inhmukhawm leh maithei, mahse kan kim thei tawh dwn si lo. Kan chanchinte pawh ral atanga inral hriat bak chu inhriatpawhna kan nei thei tawh lovang. Chu tih hunah pawh chuan THIAN ka la ti fan ang che. Mahni zawn theuha kan buai tawh dawn avangin tuna inkawmngeih em emte pawh hi kan inngaihsak theih loh hun a lo la thleng anga, kan taksain a chakna a hloh a, kan tha te a lo zur hunah chuan awmhmuna titiin, min ngaihthlak saktu te an awm chuan kan chanchinte hi kan la sawi thin anga, lungleng leh za lo chung chung pawha kan nuih hun a lo la thleng dawn asin. Chu mi hunah chuan thalai zawkte tan chuan hnawksak pawh kan ni tawh zawk maithei, mahse maw thian duhtak, kan taksa chaknate leh khawvel nunphung ten min kalsan hun chu lo thleng mah se THIAN ka la ti fan ang che.

Hawh hlim thei kan nih lai hian hlim ila nui vak vak ang, engtik niah emaw chuan kan la inthen dawn si a. Kan inthianthatna leh hmangaihna chu engpawh lo ni se, hetianga intawng tura min siamtu hian inthen leh turin min duang tlat si a. Inngaina a, inkawmngeih a, harsatna paltlang ho turin kan intawnga, inhre reng turin inthen a ngai leh si. Kan inhmuhkhawm leh hun tur hi engtik ah nge ni ang le, vanneihnain kan chungah zah a ngai a nih chuan kan la intawk khawm leh maithei tiraw, mahse chu chu chhiatna vang pawh a ni tawh zawk maithei a sin. Inthian thatna hian hmangaihna a keng tel a nih chuan, tun hun hi lanchhuah tir hun a ni dwn lawm ni ka thian. Nakinah chuan kan tun hun sawi let bak hi tih theih kan nei tawh dwn lova, sawi khawm leh ni awm mah se kan kim thei tawh dwn si lo, inthenna ramah kan la awm miau si a.

Nunphung pangngaite, chetphung pangngaite leh kan awm dan zawng zawng te hi, engtikah emaw chuan mitthla a fiah lo ruaia lo lang bak chan reng kan nei tawh lo anga, chutih hunah pawh chuan THIAN ka la ti fan ang che...

THO LA DING TA CHE

“Kaihruaitu tha awm lohna hmun chu a chhe thin” tih thu hi kan bengah a cham reng a, tun thleng hian a la ri nawn fo thin. Kohhran mite tana rilru leh ngaihtuahna i sên laite, thluak chauh ni lo, thinlung nena ngihtuahna i hman laite kha kan va ngai thin tak em. Rawngbawl tura ke pente hmasawnna thlen tur chuah ni lovin, hma hruai sak leh rawngbawl tura mamawh i nihna kha a la ngai reng a, i pawimawh takzet a ni.

Hliam i nei em ni, nge i tha a thum zawk? “Thlasik ralin nipui a thaw a, hnah hlui chu hnah tharin a thlak thin” tih ngaihdan pû a ui chuang thut mai zawng thil dik a ni dawn em ni? Thlasik ralin nipui chu a thaw ngei a, hnah hlui pawh hnah tharin a thlak bawk; nimahsela nipui a thawt zawh hnuah thlasik a rawn thleng leh thin asin. Pawimawh lo leh tangkaina nei lo anga i inngai a nih chuan kha i ngaihdan kha keini chuan kan pawm lo bur. I pawimawhna a la tla hniam lova, a la pangngai reng a ni tih hi theihnghilh lo hram rawh. I tan kohhran mite hian tangkaina an nei lo pawh a ni thei, mahse an tan chuan i hlu takzet a ni.

Midangte sualna hmuh hian chauh a awl a ni tiraw, Biak Ina an awmdan leh an thusawite ngaihtuah lek lova pawn lama nun hmang thinte hmuh ngat phei chuan, kohhran hote zinga tel chakawmna zawng zawng hi a bo ti tih nghal thin a ni tiraw. Mahse maw, heti zawng hian han ngaihtuah teh mah, a fel lo leh tha lo zawk pawh a chau lo a nih chuan; nang, a fel ber lah mahni thusawia ding ngam thin zawk chu engah nge i chauh teh lul ang ni. Mite tana malsawmna ni a, hmasawnna khawnvar chhit ensaktu i nih kha theihnghilh lo ang che.

Ruahmanna fing tak tak i siam thinte, i remhriatna leh thiamnate kha kohhran hian a mamawhin a la duh reng. Kohhran mite dik lohna leh that lohnate, rem an hriat tawk lohna leh kalphung tha lo an kalpui pawha a dik lo lai hrilh hre tur leh, siam that dan an thiam lo a nih pawha hrilh hria a, siam tha turin nang lo chu tunge awma, tling chuang ni? Lalpa’n talent tha tak a pek che leh nangmaha theihna awmte kha, hman lohva up beh mai a tan chuan a uiawm thlawt. Nangmah vanga hmasawn thei, ngaihtuahna i sen avanga rahbi thar rap theite hi hruai kal la, dinhmun tharah hlangkaiin kaihruai ta che. A bik takin thalai te’n kan mamawhna che a sang lehzual a nia. “Ka tha leh zung a thuma, chakna ka nei lo” i ti a ni maithei, mahse i tha a la thum lo ve, i chakna kha hmuh theih a la ni. I mihring taksa chu bawrhsawmin chakna a hloh pawh a ni thei e, nimahsela i ngaihtuahnate erawh an chak ngaiin an la chak reng a lawm. Thil tha ni a kan hriat, tha hauh si lo a awm a, thil tha lo leh tangkai lo ni a kan ngaih, kan tana tha em em si a awm bawk, ngal tha chak vanga ke kan chheh ran rikngawt chuan tluk mai loh chu hmabak kan nei lo; chu vang tak chuan a ni kan mamawh che ni. I ngaihtuahna fing tak nen hma min hruai sak la, kawng dik leh tha chu min kawhhmuh ta che.

Finna i nei a, rem i hriain hmangchang i hre bawk, chakna tinrengin a hual vel che a ni ber. Lalpan a duh che a, kohhranin an mamawh a che.Ka rawl a chau i ti a nih pawhin, ngawi reng chuanga ring tak a thu sawi thin , i thuziak kha kohhran chanchinbuin hian a nghak reng e. Nangmah beiseitute hi han thlir ve teh mah, beidawngin i awmtir dawn em ni? I hlutzia leh pawimawhzia haider lovin, Lalpa leh a ram tan
“THO LA DING TA CHE”.

RALTIANG VANGKHUA

Thingtlang khua ah i kal ngai em? Khawpui ang hian nunphung a sang lo va, eizawnna ber loneih a nih avangin chhunah chuan khua a reh hle thin. Sava leh ramsa an la tam thin a, chhun pachan lai paw'n lung tileng tawk chiahin an hram chiah chiah thin a, chutih lai chuan Primary School-ahte chuan, zirlai chiar nak nakte leh, zirtirtu aw rite chu an inchhawn nak nak a. Nula tlangval leh nu leh pate erawh, an lawmrualte nen an buh hmunah fehin, an sir tawlh tlang dial dial a. Chhun pachan laite chuan, an lo sira kawrte tui, vawt reih rawih in pahin hnahthel thliin a chhem len seng sengte chu an thlir veng veng thin. An khawsak sang lo mah se, khawvel mawi hi an hlimpui a, thlalak mawi tak tak hmu phak lo mah se, ram pangpar leh mual dung mawi tak tak ten a hual vel a, eiruknain an nun a tibuai lova, Pathianin nunna hlu tak a pek chu hlim takin an hmang thin.

 

Raltiang vangkhua lo lang saw ka thlir thin,
Nichhun awmhar ti zualtu a chang thin.

Tuaidâwn lawmlaite tualchaina hmun saw,
Hmun dil riakmaw sirva tuanna hmun saw.

Turni vanzawl kaiin leilung a zai,
Awmhar baw ar a pau, zun zam a zai,

Cho-ui bauh rawl leh lengkel bê zawng pawn,
Lunglen zai hla an bân nunhlui an dâwn.

Thiamzir naufa lawina zir run a  chiar nghian,
Zirfa fahtu’n a chhawn sakhmel hlim hian.

Lawhleng, chhuihthang, chun leh zua tuan an rel,
Fangmualah lâwm rual nen sirsawn an rel.

Hahchawl dawm nan zotuithiang an dâwn za,
Chhemdam thlifim chhai lenghawr leng an thlir za.