LUANGLIAM (PART II)

1.  Ka thinlung leh ngaihtuahnate hi lalram ni sela chuan, nang chu khua leh tui nei lovin i awm reng ang, a chhan chu, ka rilru leh ngaihtuahnaahte hian midang an awmve phal lovin i nek chhuak zel si a. I thinlung kha Tân In ni thung sela, kumkhuaa tang turin thil tihsual ka inpeih reng, mahse chute a nih chuan tuinnge Tân In chabi chu kawl ta ang le? Thil mawi an sawi apiangin ka rilruah i rawn lang a, a chhan chu thil reng reng an thatna leh mawina sawifiah nan anmahni aia tha kan hman thin vang a ni. Duhtak khawvela thil mawite hi i hmaah an zak a, hmun danga an hmai uang em em thin pawh i hmaa an awm chuan zah vangin an hmai an thup hram hram thin.

2.  Tunah kan inthen tiin ka lakah beisei neiin min rawn pana, in intihthiam loh chhan chu ka hre lo. Keimah vang a nih loh hram ka beisei. A chhan chu keimah vanga i kalsan a nih chuan, keimah ngei pawh hi midang vang bawkin min la kalsan leh ang, chu chu thleng turin ka duh lo a ni. Inthenna avang hian rilru a na thin a sin, mi dang rilru nâ em ema siam chu a tha hleinem. Ka duh che i hria, mahse midangte rilru a nat phah erawh ka duh lo a ni. Chuvangin ngaihtuah chiang leh ula, inharsatna inhrilh tawn rawh u, inngaidam tawn ula, hlim takin in nun hmang rawh u, tumah rilru nain insiam tawn lo ula, khawvelah hian hlimna tluka hlu a awm lo a nia, chu chu hrereng rawh u.



3.  Eng tikah emaw chuan ka la tawng ve mahna tiin hun rei tak chhung chu ka kawppui tur lo lan hun hi ka lo nghak tawh a, ka nghah chhungin min beiseitu pawh tam tam ka hmu, mahse an lakah ka rilru ka pe thei lo a ni, mi danglam bik ngaina ka nih vangte pawh a ni mahna. Chutih laiin nang ka nunah i rawn lut a, midangtea awm ve lo chu nangmahah ka hmu a ni. Kum nga hnuah nangmah chiah hi ka duh awmchhun leh ka rilru la peng thei awmchhun i ni. A chang chuan keimah ngei pawh hi ka inringhlel a, tihsual leh ka hlauh em vangin tun thleng hian ka la hlauthawng a ni.



4.  Rilru mumal pawh ka pu hleithei lo. Ka ngaihtuah loh che chuan ka pangngai lova, ka ngaihtuah lah chein ka buai zo vek zel bawk si. Ka bula i awm changte hian lawm em em chungin ka tha khur a, kan inbiakte hian ngawi reng thei ila ka ti thin. A chhan chu maw, i aw ngaihno bei tak hi hre reng thei ila, tawng dang, keima tawng ngei pawhin pawlh dal lo sela ka tih vang a ni.

5.  Ka thlir thin che a ka thlir ning thei lo che, en zawh chiah che awh hian ennawn leh nghal i ngai thin. I mawi zia hi i hre lo em ni, pianfung nalh an sawi apiangin i hming hi a thunawnah an hmang thin a, a tawp khar nan an hmang bawk thin. Nalh em em bak hi tih tur i nei lo em ni aw ka ti fo thin, innthian zaho hian in mawi em em vek a, chung mawi em em zingah chuan nangmah i mawi ber. I kawng kal hmu chea thllir let lo che an awm a nih chuan, mipa an ni lo a nih loh vek pawhin pâ loh rukna riau an nei a ni ngei ang. Angel zawng zawng hian thla an pu vek emaw ka ti thin a, mahse nang ka tawn hnu che hian ka lo tisual tih ka hria, a nih leh nangmah chauh hi em ni angel zinga thla pu lo awmchhun chu?

LUANGLIAM (PART VI)

1. Hetiang khawp hian lunglen hi a lo na thei a ni maw. Duhtak, hmangaihna thu leh i hmingte hi ka ri hriatna bengah hian an khawk za a, ri zawng zawngah chuan rimawi ber an ni. Mahse hetianga min cham chilh reng a ni chuan, lunglen vangin ka nunna hian a tuar anga, ka thih hun pawh hi ka dam thleng zo lo ang tih ka hlau a ni.

2. Inthian zaho hian in mawi em em vek a, chung mawi em em zingah chuan i mawi ber. I chhe lo ka ti mai pawh a ni lo, kei chuan tha ka ti ber che. Dawihzep pawh min ti thin maithei, ka hrethiam lutuk, mahse i hmaah hi chuan inrintawkna ka tlachham thin a ni.

3. Reh reng thin mah la i tha reng tho va, ngawi reng mah la i la duhawm reng. Thinrim mah la i hmel chu a that ngaiin a tha reng a, i kâ chipin engmah sawi lovin ngawi reng mah la, i ngainatawmna chu a pangngai reng.

4. Aw khuangruah chiar nghian hian ka di ngaih lai a tizual e, bang teh se aw an run kaina min dal lo se. Ban zai a rel loh chuan thangvan rial rum leh khuangruahtui zawngte biahthu ka chah nangte, ka di te lunglen hnem a'n.

5. Ruah sur zawha khawthiang mawizia hi aw, amahin nunna hran nei ni awma mawi a ni. Mahse heng thilmawi zawng zawngte pawh hi i mawina nena tehkhin tham an ni lo ve. Khawnge mawina hi a awm a, thil nalh chu khawiah nge? Duhtak, i hmaah hian an hmai a uang zo em ilo enchhin ang hmiang.

6. "Engngatinge i rawn let leh tak mai le, ka hmangaih leh duhber min enkawl sak i intiam si a" ti a Angel ka zawh chuan, "Angel te hian angel vêk kan enkawl ngai lo atin ni" a ti a.

7. Khuarel hi tuin nge hrethiam ang le, kan hlimpui thin ten lungngaihna min thlen a, min tinuitu ten min vel leh si. Lunglen hnem theitu ten lung an ti leng a, beiseina min petu ten beidawngin min siam leh si thin anih hi.

8. Zan rei tawh lamah hian ngatinge ka ngaihzual zel che le, mi zawng zawng mut reh lai hian kei chuan muhil thei lovin ka ngaihtuah che a, khawnvar eng da lap hnuaiah hian i chungchang thu lo chu ka rilruah hian a awm lo a ni. Dawhkana kiu nghatin kut pahniha chal dawmin ka kun a, zawi sapin i hming hi ka lo lam nawn leh thin.

9. Zan boruakte hian hmangaihna thu an keng a nih ngai chuan, ka tana parvul mek khan thuchah a nei mial anga. Aw reh ri leh thawm nei lo te u in aw chhuah ula, ka di hmangaih biahthu chu min hlan turin ka ngen che u a nih hi.

10. Zan reia thawm a reh hnu pawhin ka ngaih che hi a reh thei si lo. I nui hmel kha ka mitthlaah chiang takin a lang reng a, theihnghilh tum chein awmzia a nei lova, hriatreng tum che pawhin awmzia a nei chuang lo, achhan chu ka rilrua i awmdanah hian thuneihna ka neilo a ni. Ka ngai em che tih bak chu hriat a lawi pawh ka nei rih lo.

11. Fur ruah sur ban lama ruahtui farfep fep hian i hmangaihna rawn keng tel teh sela aw, hei tunah pawh nangmah ka ngaih em em laiin an far ri leh tliar tliar asin. Thu engemaw tal i rawn chah lo ami?

12. Ka thu hriat hi eng thu nge nita le, nang nena nun hman dun a rem lo maw!! A ni thei dawn em ni? Leilung i rawl chhuah la, tupuite u, in fawn rite chhuahin rum hum hum rawh u, kei pawhin ka duhtak ka nei thei dawn lo. Hlim ula ka thik cheu anga, tap ula ka tah pui ang che u.

13. Ka bulah awm reng mah la ka khawih thei si lo che a, inbe reng mah ila engmah ka sawi thei si lo.I tel lo chuan mi tam tak zingah awm mah ila ka mal ngawih ngawih thin.

14. Engati nge rem leh lo tur chuan i lakah beiseina min siam le, min chhaih kual vel mai mai tur chuanka lo ring lo che a, ka phal bawk lo che, mahse ka lo ring sual che a ni. Ka chunga i tih ang hian midang chungah chuan ti ve tawh suh ang che aw.

15. Enga tinge ka rilruah hian i awm reng a, engatinge ka theihnghilh theih loh che. Nang nen nun hman dun duh mah ila, chu chu atheih loh tih kan hre ve ve si. Mahse ngati nge ka nun ti hreawm turin keimahah hian ser nung i siam tlat le.

16. Ka ngaihtuahna leh ka rilrute hi thunun thei ila chuan nang theihnghilh daih che hi ka duh. Neih theih loh tur awta hun hman reng ai chuan, theihnghilh daih che ila nun nuam zawk ka hmang thei tur. Mahse ka ngaihtuahna chunga thuneitu pawh nang i ni lehzel bawk si.

17. I thil sawi a nih vanga za lo chung pawh a nuih hi bansan hun ka nei thei angem le. Ih e, Kan inkarah hian engmah awm lo mah se, ka hriat laia midang tha i tih thu i sawi hian na ka lo ti thin.

18. Thiante an chhas te nen a hlim taka an nuih dar dar lai te hian a rukin ka muttui ka hru leh fap fap thin, ka duhna che hian awmzia anei thei dawn lo a nih chuan, a ruk a mittui hruk fo hi engtin nge ka bansan tak ang le.

19. Theihnghilh daih che ka tum chang hian, ka theihnghilh tawh che tih hi ka lo theihnghilh leh thin a. Tunah chuan hriat reng che ka tum tawh zawk ange, ka hriat loh karin ka lo theihnghilh che mahna.

20. Inhmelhriatna nei hran lo mah ila, ka hming chu i lo hriat tawh tho ka ring. Ih maw, mi mawl pakhat, nang hmangaiha duh em em tu che kha, kei mi mawl ve tho hian ka duh tlat a nih hi.

LUANGLIAM (PART V)

1. En teh, thla khi i hmu ve em. Inthlahrung deuhin tlang kar atangin leilung a rawn bih leh dek dek tawh asin. Midang hmuh loh tur a Nihliap phena kan inbih sat sat lai kha ka ngaihtuah lo thei lo a ni.

2. Min ngaih thu min hrilh khan ka dam sawng sawng tih bak chu engtin nge ka awm pawh ka inhre bik lo. Mahse, kei min ngaihtuah ni mah la, ka hmuh theih si loh che avangin i ngaihtuahna ami keimah kha thikawm ka ti.

3. Lung sam kara voilet par nen em ni ka tehkhin ang che, nge ni a luite kam a pangpar mal din, thlifim dawng a peih leh peih lovathle hnep hnep nen hian. A eng zawk pawh chu ni se, an tluk lo ve ve che.


4. Ngaihtuah i ti tam a, mahse thil dang ka ngaihtuah theih loh vangin ngaihtuah tam chu ka ni lo, mahse ka ngaihtuahna i van hruai kual tak em. Ruahmanna bul tanna leh tawpna ah hian i hming a lang tel ziah thin.

5. Fur ruah phingphisiau kara chhimbal lo lang rei(h) thin nen hian ka tehkhin thin che a, mahsei lakah chuan zakin a kimki chawih chawih thin. Mawina leh duhawmna min hrilhfiah rawh ti sela, nangmah hi ka kawhhmuh ang.

6. Hlawhtlinna hian engtik lai pawhin min hnaih reng thin lo, chutih hunah chuan rilru a chavaithin a, mahse i aw hriat chuan ka dam sawng sawng a, hlawhchhamna in min hnaih tih pawh ka theihnghilh thin.

7. I kut ka vawn khan, ka ta ni la ka ti hliah hliah. Ka bula i awm chang hian, ropui leh thei ta riau ah ka lo inngai leh ringawt zel. Thil hreawm leh harsatna tawk mah ila, ka bula i awm dawn phawt chuan chung chuan ka rilruah hmun an chang ngai lovang.

8. Zanin chu ka ngaih che a zual riau mai, mutchhuak pawh ka neilo, khumah ka let ka let ringawt. Ka zangthal a, zangthalin ka ngai che a, ka saisir pawn saisir zawngin ka lung a leng a, bawkkhupa ka mut pawn bawkkhupin ka ngaihtuah zel che a.

9. I reh vang vang hian ngaih a tha lo thin a sin, min lo be ve thin la. I aw ringawt pawh hi ka hlimpui thin a.

10. Inkhel chu ka en ve tak na a, ka rilru erawh nang nena kan awm dunna khelmualah bak a awm lo. Tv a inkhel chuan an lama an pet goal hlauin theih tawp an chhuah a, keini ve thung chu kan pahnihin kan pet goal tawn lovang tih hlau vin kan hmanhlel thung a.

11. Hlim reng turah ka lo inngai leh thin, harsatnate hian min hmel hriat lo mah se a pawi lo asin. Mahse tha vek e, "Nakina kan lawmna tur an la ni dawn alawm" ti a i sawi hian ka lo inhnem zel ang.

12. Mite chu thu leh hla nen thiam takin an duhtakte chanchinte ziakin an luangliam a, chung an thu ziahte chu thenkhatte chu chhiarin kan awmdan nen ka lo inhmehbel ve ringawt thin a, ka kiai leh sak thin.

13. Zan hi hahchawlhna a nih ngai chuan hahdam takin hun hmang ang che. Kei chu induh tawnna hian ka nunphung a tibuai zo a, chawlh hunah pawh chawl lovin ka ngaihtuah thin che. Mahse nang chuan ti ve kher suh aw, keimah vanga i taksa a chhiat phah chu tha ka ti lo ania, nalh deuhin awm reng ang che.

14. Inkhel chu ka en ve tak na a, ka rilru erawh nang nena kan awm dunna khelmualah bak a awm lo. Tv a inkhel chuan an lama an pet goal hlauin theih tawp an chhuah a, keini ve thung chu kan pahnihin kan pet goal tawn lovang tih hlau vin kan hmanhlel thung a

15. Inhmuh leh nghakhlel takin kan nitin hun hman dunna ka pan a, mahse nang hmuh tur i awm si lo, i awm loh chuan hmun ruak mai a ni. Midangte chetla vel awt taka thlirin ni ka hmang liam a nih tak hi.

16. Tlai lam savate pawhin lei hrikte hnenah rawl chhuah turin hun an hlan chhawng a, mahse kei chuan i laka ka lunglenna hi hlan chhawntur ka hre lo a ni. Chhun eng thima chang turin hunin a liampui a, mahse ka duhna che liampui tur hian engmah an chak zo lo a ni e.

17. Ruah sur ban a thli thawin thing hnah a chhemte chu an ri seng seng a, ka duhber thuchah an rawn ken beiseiin ka zawt a, an ni chuan "I lung a leng nih kha, a ni chu thlamuang takin a mu siai siai tawh e" ti in min chhang ringawt a.

18. Zan rei lam a nih tawh avangin thawm a reh a, mahse ka ngaih che erawh a reh lo. Reh ri a ring tial tial a, i laka ka lunglen pawh azual tial tial. Mut ka tum thin a, mahse ka muhil thei lo a ni. Pawnlama dai far ri kauh kauh chu ka ngai thla a, lunglen nen a inrem phian.

19. Mite chu vartianin an mu lai a kai tho thin a, tukchhuak thain a hmuak thin. Kei chuan ka ngai em che a, zanah chhin khat mah chhing lovin zankhuain ka ngaihtuah che a, vartian kai thotuah ka tang ta zawk a nih hi.

20. Kan kar a hla si a, thlifim thaw heuh heuhte hi thu an chah theih ngai a nih chuan, a hnena sawi tur ka neihte hi hlan chhawng turin chah ka van chak tak em.

21. Inchhung khat tlatin mipui kan thu a, hmun ruak a awm lo, kil khatah i lo thu mial lo maw tiin ka mit lenin ka zawng kual che a, mahse hmuh tur i awm si lo. Hmun ruak awm lohna hmun hi i tel lo chuan a va ruak tak em.

22. Kan inhmuh loh chhung rei lo teah pawh hian nunphung pangngai in ka awm hlei thei lo a nih hi. Ka bula i awm loh chuan ka pangngai lo va, i bula ka awm lah in ka buai zo zel si. Aaaa ka ngai che ni tawp mai.

23. I laka ka lunglen hian awmzia nei teh sela, mi vannei ka va ni dawn em..

LUANGLIAM (PART IV)

1.Tu pawi mah sawi lo i hmel tha em em te, i awka ngaihnobei taka mi lêm thin leh tawrh zawh loh thin i mitmeng mawi takte leh ngaihnatawm taka i nui seih thinte hian i zuna uai turin min sawm thin.

2. Ka sawi thiam dawn emaw ka ti a, mahse i bulah hi chuan ka hamhaih leh tlat thin. Amak teh e, midang bulah lem ka tawng zawt zawt a, mahse i danglam bik vang nge, i bulah hi chuan engmah ka sawi chhuak thei thin lo.

3. Khua a lum ê, ka di ka ngai ê.
Ni a sa ê, duat lai hmuh hun a nghahhleih awm ê.
Miten daihlim an zawng,
Keiin ka di ka zawng,
Khawlum vangin nunkhua a nguai,
Lunglen vangin thinlung a zuai.

4. A chang chuan ka mit hian ka thinlung hi a thik lek lek thin, a chhan chu ka thinlunga i awm reng lai pawh hian ka hmu thei thin lo che a.

5. Nang hmangaih hi thil sual a nih chuan, mi tha nih ka thlahlel lo ve, Tan In thleng rawkin ka thil tih sual hi chhunzawm zel ka duh zawk.

6. I va meng rei thin ve min tih hian,"chumi khami chu tih a ngai a", ka ti leh mai thin a, mahse a nihna takah chuan nangmah vang a ni reng sia.

7. Sana ban kal ri chhet chhet te hian, "I lung a leng" min ti a, phat ka tum ngial a mahse ka pha zo lo a ni. Ngaihtuahna a kal thui a, mahse thil thui taka ngaihtuah dawnin a tawi leh si.

8. I chungchang bak chu thil dang sawi tur pawh ka hre lo, mi nin pawh ka hlawh maithei, mahse chung chuan min tibuai lo. Duhtak mite hnawksak tih chhan tlak i tling em a ni.

9. Khiang hnah phe hlep hlep mawizia hi aw. A hnuai a thlifimin i sam a chhem len siau siau lai phei kha chuan, khawvela thil mawi ber hi ka hmaah pho lan a niin ka hria.

10. Ruah sur bang thei si lo,
Lunglen reh thei si lo,
In hmu thei bawk si lo.
Ngaihtuah lo thei si lo,
Bansan thei chuang si lo...
Duhtak, Nangmah vang vek.

11. Mang lama kan awmdun chang hichuan, ngatinge mumang siamtu hian thanharh hi a lo siam le? ka ti fo thin. Ka mumangte hi a takah chang sela kan nun hi ka mumang ni zawk teh sela aw.

12. Ka thinlungah lal ram i din a, ka ngaihtuahna i luahkhat zo va, ka rilru min neih sak a nih tak ber hi. Hetiang renga i awm chuan khua leh tui nei lovin i awm thuai ang, a chhan chu ka thinlungah midang awm ve phal lovin i nekchhuak zel si a.

13. Lunglenna mittui tlate hi rangkahcak ni sela chuan, i tana ka mittui far vang hian khawvela mihausate awh rawn i ni ang.

14. Bang laia sanapui kan tarin a bân zawi takin a vai ri chhat chhat a, chumi rem chuan kei pawn zawi sapin i hming ka lo lam ve zel a, mahse lunglen erawh a kiang chuang lova.

15. "Zan a rei tawh viau nain ka ngai lutuk che...he2, miss you muah" ti a min rawn txt hi ka chhiar nawn zel a, nang hmuh tur i awm si lo, ka lo chhiar nawn leh rih mai ange.

16. Ruah do zawr hnep a mi bathlar hul lai chuh a kan din far tlak tlak lai kha i la hria em, hei tunah ruah a sur leh tawh asin. Mahse ruah do pui turin ka bulah i awm si lo, kut vei lamin ruahmal ka dawng a, ka lo man kep ang che aw.

17. Thu ropui bera an sawi chu"Induh tawnna" maw lo ni, a dik ang, a dik em em ang. Ka tihna chhan chu ka lam hawi a i seih hian ka tan khawvel hi a par nawn leh sak zel a.

18. Suangtuahna hian thla pu sela, van rang chhum inzam diar diar karah lengin i lam ka rawn pan ang, khaw hmun lova awm hi ngaihtuah titamtu a van ni em.

19. Ka thinlung min ruk sak a, ka neihchhun hmangaihna min lak sak a ka ngaihtuahna nen. Mahse rukru ni mah la, ka hrem thei lo che a, ka haw lo che. Ka duhber i ni miau a, ruk hmangah chuan i duhawm ber.

20. I hmel ti mawi tu ber chu khuavang chhinchhiah kha a ni, ka en ning lo che. Mit tla lek lek enzawh chiah che pawn ennawn lehnghal i ngai thin.

21. Zana thanhrah chang hian, tui deuhin mu la ka duh thu hi keimah leh keimah ka inhrilh thin. Tukchhuak thain hmuak che sela, tawnmang ram fan nuam aw.

22. Engmah sawi thei si lova inbiak hreawm dan hi aw, a kut vawn sak mah ila ka khawih thei si lo. Kan tana hun ruat hi engtikah nge a lo chhuah ve ang le, duh berte neih theih loh tak hi chu aw.

23. Inlaichinna awm thei lo inlaichinna hi eng chen nge kan kalpui dawn, pen khat tal kan pendun thei lawm ni. Hetiang ringawt chu lungawi a har asin.

24. Nang hlat che ka tumin ka hnaih leh thin che a, hawisan che ka tumin i lam ka hawi leh thin, ka tana vul lo tur i nih chuan ka hmuh phakah vul lo law law la tha zawk tur.

25. I bula awm chaka ka hnaih che hian, zak chung chungin asin ka pan thin che, mahse nang chuan ka lak atanga a hla thei ang bera awm i duh zel si a, i duh ang chuan ni mai rawh se.

26. Mawi i tih em em vana arsi a lo lan chang hian, chhiar seng dawnlo mah ila, mittui karah i hming lam chhungin ka la chhiar zel thin asin. Mahse heng zawng zawng hian i lakah awmzia a nei si lo.

27. I tan hi enge ka nih a, i enge ka nih le, ka duh tlat bawk si che a, ka van â tak em. Mahse nang duh leh hmangaih vanga ka â a nih chuan fin hi ka thlahlel love.

LUANGLIAM (PART III)

1. Miten hmangaihna leh lunglenna thu an sawi ka hriatte hian ka rilruah i lo lang thin. Mite nun ka enin kan nun nen a rukin ka tehkhin thin a, nang nena nun hman dun hi ka duhthusam a ni.

2. Kan intawn atang hian hmuh theih loh mawina ka hmu a, reh rimawina min hriattirin khawharna leh lunglenna tualah min len tir asin. Duhberte nei thei tluka vannei an lo awm lo.

3. Hmangaihna an tih hi thil atthlak leh awmze awm lo a ti a, chung thil atthlak leh awmze awm lo chu ka ngaina a, a awm lo vang tih ka hlau a ni.

4. Sawi tur hre lovin ka hawihai a, mahse ka lung a leng tho si a. Khawharna hi a takin hmu thei ila chuan lunglen pawh a ziaawm deuh tur. I zunah hian ka uai zo ta. Hmuh hlan che ka van nghakhlel tak em.

5. Tlang karah ni a liam a, i laka ka lunglenna erawh liam lovin min la chenchilh reng a nih hi. Ka ngaih zual chang che hian i zuna uai tura piang ve chauh nite hian ka inhre thin.

6. I chanchin leh lunglenna thu hi a inkawp tlat a nih dawn hi, lunglenna chungchang sawi apiangin i chanchin hi sawi tel zel a ngai si a. Chhun hi liam sela, zan hi ral rawh se, ka di biahnem hlanna min dal rei lua e.

7. Ka en ngai en rengin ka awm a, ngaihtuah ngai hlir ka ngaituah nawn a, hming pakhat erawh zawitein ka lam sep sep. Ka hawina lam apiangah ka hmu che a, engkimah hian enge i ngaihdan ni ang tiin ka inzawt fo thin.

8. Thla eng hliah tum a chhum inleh pel zut zut leh inbuan let tup tupte khi i lo hmu ve a nih chuan "ka thlahleh ngawih ngawih che" tia thu ka chah kha an hrilh ngei che ka beisei.

9. Thla eng hnuaia luite tui luang ri her herte hi biak theih nise ka ngaih thu che hi ka sawi pui tur. Let leh tawh lo turin lui mawng lam an pan zel a, mahse i laka lunglenna chu ka hnenah a rawn let nawn zel a.

10. Khaw awmdan leh i awm dan hi a inhmeh tawp, i lakah hi chuan khawlum hian hnehna a chang lova, khawvawt pawh hi meikhupin a tawlh bo thin. Ka lam hawia i seih hian khawvel a par nawn leh thin a, inthenna tih loh engkim mai hi i inhmeh em em vek a nih hi.

11. Zan boruakte hian hmangaihna thu an keng a nih ngai chuan, ka tana parvul mek khan thuchah a nei mial anga. Aw reh ri leh thawm nei lote u, in aw chhuah ula, ka di hmangaih biahthu chu min hlan turin ka ngen che u a nih hi.

12. Khuangruah chiar nghian hianka di ngaih lai a tizual e, bang teh se aw an run kaina min dal lo se. Ban zai a rel loh chuan thangvan rial rum leh khuangruahtui zawngte biahthu ka chah nang e, ka di te lunglen hnem a'n.

13. Thla ral lamin dava taka leilung a chhun en hnuaia rannung hram rite hian i mawi thu ringawt a ni an sawi, kei chuan heng ho zawng zawng ai hian mawi ka ti che.

14. Mite chu vartianin an mu lai a kai tho thin a, tukchhuak thain a hmuak thin. Kei chuan ka ngai em che a, zanah chhin khat mah chhing lovin zankhuain ka ngaihtuah che a, vartian kai tho tu ah ka tang ta zawk a nih hi.

15. Tukchhuah nuam, aw(h) tlailam hman nuam ka tihna a nih kha, nilo, muttui mangtha tih a ni sawi ka tum zawk chu... Aaaa hun chu apawimawh loah ngai mai ang, ka sawi tum chu engtik lai mai pawh hian ka ngai che tih hi.

16. Chhun pachan lai hian nangmah ngaih vangin pachan har ka ti thin, ka hmuh apiang che hian hmuh thiang lo hmuah ka intehkin fo a, a chhan pawh ka hmaa i inlan apiang hian ka buai chhe zo vek thin.

17. Ka bulah awm reng mah la ka khawih thei si lo che a, inbe reng mah ila engmah ka sawi thei si lo. I tel lo chuan mi tam tak zingah awm mah ila ka mal ngawih ngawih thin, nangber i awm loh chuan khawi hmunah pawh hian mi pakhatin kan tlem lutuk ziah.

18. Hmangaihna hi a nunrawng an ti maw, kei chuan hmangaihna nunrawnga puh tu chu a nunrawng zawk ka ti lo thei lo a ni.

19. Rose par keng chunga darthlalang hmaa i dina i mawizia kha aw, darthlalangah khan pangpar pakhat i hmuh thu i sawi a, mahse kei chuan pahnih ka hmu asin. Pangpar pakhat zawk chuan tuna i rose ken lai kha a keng a.

20. Tuipui sava hram thawm leh tuifawn ri zawng zawng te hian i hming hlir an lama, tuipui boruakthaw heuh heuh te hian i chanchin lo chu titi dang an nei lo. Kei erawh chuan ka ngaih em che avangin ka chau zo va, ngai tur che pawhin chakna ka nei lo lek lek tawh a ni.

21. Hriat rengna chauh hnutchhiah tur chuan ka hnen ah lo kal lo la, nangmah inhnutchhiah tur zawkin min pan ta che.

22. Mangtha ka tih loh che hian ka ngainatna che leh ka duhna che a kiam a ni lo asin, ka duh em vang zawk chein he tawngkam hi i lakah ka hmang phal lo mai zawk a ni.

23. Ka thiam loh a ni tia mittui nen a min ngen lai khan, engvanga ngaithla duh lo nge ka nih le. A pawi lutuk, keimah zawk hian ngaihdam ka dil let zawk che a nih hi, mahse nang chuan ka dilna awka hre thei tawh lovin i thlarau i thlah ta si a.

24. He zan khawharah hian, mawi i tih em em thin pangpar te kha an inthehthil leh siau siau va, chumi ai maha mawi tum arsi te pawh anmahni kawng theuh chhuiin an her asin. Thli thawin hnahthel a chhem rik te hian i hming hlir an lam a, mahse nang chu chhang let turin i awm ve tawh silo...

LUANGLIAM PART I

1. Tun ang zan khawharah hian mi zawng zawng chu an mu reh thiap a, mahse kei chu sathau khawnvar eng da lap hnuaiah lunglengin ka indawm kun a nih hi. Lunglenna mittuite hi rangkachak nisela chuan, zanina i tana mittui ka sen zozai avang hian nang chu khawvel mi hausate awh rawn i nih ang. Ka mut hmunah mutthilh tumin vawi engemaw zat ka mu nawn a, mahse ka mutbu nena inbuan leh rikngawt bak chu engmah a thleng lo, ka ngai che tih mai loh chu. Ka let ka let a, ka pangte hi ka delh na them thum a, mahse heng ka nâ zawng zawngte pawh hian an nat thu sawi lovin i hming tho a ni an sawi ni. Reh ri ri raih raih pawh hian i chungchang thu bak chu sawi a nei chuang lo va.

2. Nikhat atana in date tura inremsiamna kan siam kha i la hria em, khami ni kha nikhat ka hman liam tawhah chuan ni mawi ber a la ni. Kan inremsiamna a zawh tawh hnuah chuan nunphung pangngai a ka nun leh mai ka inring a, mahse ka lo ring dik lo, ka lo vei hman reng che a, kan inremsiamna hi kan pawt sei mai thei lo em ni, a nih loh pawhin nang nen hian nikhat tal vui liam leh thei ila.

3. Engtin nge ka hriattir ang che, kan inthianthatna hian a chhiatphah ka hlau si a, mahse thian nih ringawt hi chu ka tan a tawk lo a ni. Mak min ti mahla ka dem hauh lo che, keipawh mak ka inti, thiante han duh tak tlat mai chu(h). Kan inhmuh apiang hian ka duh zual che a, ka inbiak changte hian pawm vawng vawng mai che ka chak thin. Ka duh che, min haw lovang tiraw, i huatthu sawi ka tum lo a nia. Hrilh che ka chak tawh thin a, keimaha zamna leh zahnate hian hrilh lo tur chein min ti a, mahse ka duhna che hi ka zahnate hian an khap zo ngang lo a ni. I hnena hethu ka sawi lai khan, zahna hmu lo ka ni bik lo, ka zahna aiin ka duhna che hi a buk a rit zawk atin ni. Duhtak khami ni khan ka zam ve asin, duhber leh hmangaihte chu an zahawm an lo tih thin hi khami ni khan a takin ka hria. Enge i duhthu sam tiin min zawt sela, nang nena nun hmandun tiin bul ka tan ang.

3. Lunglente hi i hre ve em, i lung a leng ve thin a nih chuan tunge i ngaihtuah thin ang le. Duhtak, lunglen chungchang ka sawi apiang hian i hming hi sawi tel ziah a ngai a, zankhaw tairek thleng pawh hian nang ngaihtuah nan hian hun ka hmang thin. Nangmah ngaihtuah tam avanga fin theih ni sela chuan khawvel a mifingte hian min râwn thin ang. Ka hriat chak thin chu tunge i ngaihtuahnaah awm thin tih hi. Kei chuan ka chang phak lo pawh a ni maithei, mahse chu lam chuan min tibuai love, ka duh che a, ka ngai che a, hei ringawt pawh hi ka tleipui thin. Achang chang chuan min hre chhuak ve thin ang tiraw, mahse chu erawh chu kei min ngaihtuah ni mahla, ka hmuh theih thin lo avang chein i ngaihtuahna ami keimah chu thikawm ka ti.

4. Kan inhmuh a changte hian ka thinlung put hmang zawng zawng hi i hnena bunruah vek hi ka chak thin a, mahse chu chu a rem lo tih kan pahnih in kan hre ve ve. Inbe reng mah ila engmah ka sawithei lova, invuan reng mahila ka khawih thei si lo che. Chawbel bulah tamchhawlin ka awm a nih ber hi.

5. Ka lo nghak ang che anga maw, mihring nunah hian hma lam hun hi a hriat loh asin. Kan pahnih a kan awm dunna tur a nih chuan engkim ka huam. Mahse ka hlauthawng a ni, keimah vanga midang i kalsan a nih chuan, midang vangin min la kalsan leh tho ang tih hi. Mahse chutiang chu thleng em suh se. Kan chungchang ka ngaihtuahna lamah hian ka nun hi a chau zo va, thil dang ka ngaihtuah thei tawh lo. Heng zawng zawng hi ka thinlunga i awm vang chuah a ni.

6. Ka ngaihtuahna leh ka rilrute hi thunun thei ila chuan nang theihnghilh daih che hi ka duh. Neih theih loh tur awta hun hman reng ai chuan, theihnghilh daih che ila nun nuam zawk ka hmang thei tur. Mahse ka ngaihtuahna chunga thuneitu pawh nang i ni lehzel bawk si. Ka duh loh zawng ka ngaihtuah a, ka theihnghilh ka duh chu ka theihnghilh thei si lo, hriatreng ka duh loh chuan ka rilru a luah a. Khawvel eng hmuin lo piang lo law law ila aw, a nih loh pawhin nang tal hi lo piang lo la a ziaawm deuh mahna.

7. Hriatrengna hi nun tihlutu a nih ngai chuan, ka nun tihlutu chu hreawmna leh khawharna hi a ni ang. Mahse pawi ka ti chuang lo, mal ngawih ngawih leh khawhar lunglenna nen hi chuan kan inhmeh ve tawh hrim hrim a, an awm loh chuan ka nun hi a kim lo zawk tawh mah a ni. Heng zawng zanwg hi nangmah vang ni mah sela nang chuan i hre kher lo vang, hriattir che pawh ngai ka ti hran lo.